An kubutar da mutane tara da aka yi garkuwa da su daga hannun wasu gungun ‘yan fashi a kauyen Kirijam dake karamar hukumar Dandume ta jihar Katsina.
An bayyana hakan ne a wata sanarwa da jami’in hulda da jama’a na rundunar ‘yansandan jihar, SP Isah Gambo ya sanya wa hannu a madadin kwamishinan ‘yan sanda na jihar.
A cewar wani rahoton ‘yan sanda, ‘yan bindigar sun aukawa kauyen ne da tsakar daren jiya, suna ta harbi a iska, kafin daga bisani suka arce da mutane tara daga kauyen.
Amma, jami’an ‘yansanda na Dandume sun yi wa ‘yan fashin kwanton bauna a daya daga cikin hanyoyin da za su bi, a kauyen Kadawan Maikomo da ke karamar Hukumar Sabuwa.
Jami’an ‘yan sanda sun yi musayar wuta da ‘yan fashin wanda a karshe suka samu nasarar sakin mutane tara da aka sace.
