Sojojin Najeriya sun hallaka jagoran ‘Yan ta’adda mai suna Mai Kusa wanda shine shugaba na 2 a kwamandojin ‘Yan bindiga da masu garkuwa da mutane da suka addabi Jihar Katsina karkashin jagorancin daya daga cikin jagororin ‘Yan bindigar mai suna Modi-Modi.
Bayanin haka na kunshe ne cikin wata sanarwa da daraktan yada labarai na sojin kasa Manjo Janar Onyema Nwachukwu ya fitar.
A cewar sanarwa,sojojin sun samu nasarar harbe Mai Kusa tare da wasu ‘Yan ta’adda guda 3 a wani gumurzu tsakanin dakarun da kuma ‘Yan ta’addar da ya wakana a kananan hukumomin Kurfi da Safana na Jihar.
Sanarwar ta kara da cewa a lokacin gumurzun,sojojin sun yi nasarar murkushe ‘Yan ta’addar wanda suka addabi yankunan yayinda wasu daga cikin su suka tsere.
