Wasu ‘yan bindiga sun yi awon gaba da wata mata daga gadon jinya a kauyen Anguwar Malamai da ke gundumar Kakeyi a karamar hukumar Zariya ta jihar Kaduna.
‘Yan bindigan wadanda suka isa kauyen da misalin karfe 12 na daren jiya, sun zarce zuwa gidan wani mutum mai suna Alhaji Shu’aibu Dallatu inda suka sace matarsa.
Wani wanda ya shaida lamarin ya ce, ‘yan bindigar sun zo kauyen ne musamman domin su yi garkuwa da Alhaji Shu’aibu Dallatu, kasancewar da isar su sun tambayi wasu samari da ke kwana a wani shago a wajen gidansa inda yake.
Alhaji Dallatu wanda idonsa biyu yana kula da matarsa marar lafiya, ya jiyo zancensu sai ya tsere.
Wanda ya shaida lamarin ya kuma bayyana cewa a lokacin da barayin suka kasu samun mutumin, sai suka yanke shawarar yin garkuwa da matarsa duk da rashin lafiyar da take fama da ita.
Ba a samu jami’in hulda da jama’a na rundunar ‘yan sandan jihar Kaduna, Mohammed Jalinge ba, har ya zuwa lokacin hada wannan rahoton.
