Kamfanin Rarraba Wutar Lantarki KEDCO ya ce kamfanin yana yin asarar kudaden shiga sakamakon tsallaken mita da jan wuta ta haramtacciyar hanya a Jihohin Jigawa, Kano da Katsina.
Wannan na kunshe ne cikin wata sanarwa dauke da sa hannun Shugaban Sadarwa na KEDCO, Ibrahim Sani-Shawai, da ya fitar yau a Kano.
Kamfanin ya ce abokan huldarsa sama da 17,190 dake amfani da mita, basu sayi kati ba, tsakanin watan Janairu zuwa Yulin da ya gabata.
Sani-Shawai ya ce bisa tanadin dokokin aiki, duk wanda aka kama yana tsallaken mita za a yi masa hukunci gwargwadon nauyin laifin da ya aikata.
Ya kuma yi kira ga jama’a da su kasance masu taka tsantsan don tabbatar da cewa ba a taba mitar su ba.
