Wasu da ake zargin ‘ya’yan kungiyar masu fafutukar neman kasar Biafra ne (IPOB) sun kashe Hausawa yan kasuwa su 13 cikin mako guda a jihoshin Imo da Enugu.
An kuma kashe jami’an yansanda da dama da cinnawa gine-gine wuta a hare-haren da ke kara yawaita akan jami’an tsaro a yankunan kudu maso gabas da kudu maso kudu.
A harin baya-bayannan kan fararen hula yan Arewa, wasu yan bindiga sanye da kakin soja lokacin da suka kai farmaki zuwa kasuwar Afor Umuaka sun bindige wasu mahauta Hausawa 4 a ranar Asabar da misalin karfe 8 da rabi na dare.
A Enugu, ranar Litinin da ta gabata, akalla mutane 6 aka kashe a lokacin wani hari da aka kai kauyen Adani a yankin karamar hukumar Uzo-Uwani ta jihar Enugu.
Daya daga cikin wadanda aka kashe, shahararren dan kasuwa ne Bahaushe, wanda aka ce yana zaune a wajen tsama da shekaru 30.
Rundunar yansandan jihar ta tabbatar da harin amma ta ki cewa uffan dangane da yawan wadanda aka kashe.
