Shugaban Kasa Muhammadu Buhari ya ce muddin kasar Libya ta cigaba da kasancewa cikin halin ha’ula’i, makamai za su cigaba da kwarara a yankin Sahel na Nahiyar Afirka.
Shugaban ya yi magana ne jiya a Fadar Shugaban Kasa dake Abuja, yayin karbar bakuncin wakilin musamman na Sakatare Janar na Majalisar Dinkin Duniya mai barin gado kuma Shugaban Ofishin Majalisar Dinkin Duniya a Yammacin Afirka da yankin Sahel, Mohammed Ibn Chambas.
Shugaba Buhari ya ce Muammar Gadaffi ya rike madafun iko a Libya tsawon shekaru 42 ta hanyar daukar masu tsaro dauke da makamai daga kasashe daban-daban, wadanda daga baya suka tsere da makamansu lokacin da aka kashe Gaddafin.
Shugaba Buhari ya bayyana Chambas, wanda ya kwashe shekaru da dama a Najeriya a mukamai daban-daban, daga ECOWAS zuwa Majalisar Dinkin Duniya, a matsayin dan Najeriya.
Yayi masa fatan alheri a ayyukansa na gaba.
