Helkwatar Tsaro ta kasa ta bayyana cewa gamayyar dakarun sojoji sun kashe sama da ‘yan ta’adda 50 da sauran batagari a fadin yankunan da ake rikici a kasarnan.
Jagoran sashen hulda da jama’a na helkwatar tsaro, Manjo Janar John Enenche, ya sanar da hakan a Abuja, yayin da yake jawabi ga manema labarai akan ayyukan sojojin a makon da ya gabata.
Yace dakarun operation lafiya dole, wadanda suka hada da sojojin kasa da na sama da na ruwa, sun samu gagarumar nasara a yankunan da ake rikici daban-daban a makon.
Ya bayyana cewa sojojin yayin aragama daban-daban da mayakan Boko Haram, sun dakile hari a kauyen Yamteke cikin yankin karamar hukumar Gwoza ta jihar Borno, inda suka kashe mayaka 4, tare da kwace bindigogi samfurin AK47 guda 3, da nakiyoyi 2 da kuma wata waya kirar Tecno.
