‘Yan ta’addan da suka kai hari tare da yin garkuwa da fasinjojin jirgin kasan Abuja zuwa Kaduna sun sake sakin wasu mutane 5 da suka kama.
Sakin na zuwa ne kwanaki kadan bayan ‘yan ta’addar sun sako wasu mutane 4 da suka yi garkuwa da su.
Da yake magana da gidan Talabijin na Channels a jiya, Tukur Mamu, wanda ke shiga tsakani a sasantawa, ya ce ana ci gaba da kokarin ceto sauran wadanda abin ya shafa.
Ya bayyana sunayen mutane biyar da aka saki da Farfesa Mustapha Umar-Imam, wanda likita ne a asibitin koyarwa na Jami’ar Usmanu Dan Fodio dake Sokoto; sai Akibu Lawal, da Abubakar Ahmed-Rufai, da Mukhtar Shu’aibu da Sidi Aminu-Sharif.
Tukur Mamu ya ci gaba da bayyana cewa ya fice daga tattaunawar ne saboda barazanar da ake yi wa rayuwarsa, mutuncinsa da kuma rashin goyon baya daga gwamnatin tarayya.
