Hukumar tsaro ta farin kaya civil defense ta kama wasu direbobin tanka guda takwas bisa zarginsu da jigilar man dizal da aka tace ba bisa ka’ida ba, daga jihar Ribas.
Kwamandan rundunar a jihar ta Ribas, Abu Tambuwal ya bayyana haka a wata sanarwa da kakakin rundunar, Olufemi Ayodele, ya fitar jiya a Fatakwal, babban birnin jihar.
Abu Tambuwal ya ce wadanda ake zargin sun yi amfani da takardun bogi wajen sayar da gurbataccen man fetur ga masu ababen hawa a fadin kasarnan kafin a kama su.
Abu Tambuwal ya ce an samu nasarar kama mutanen, biyo bayan wani rahoto da aka samu wanda ya kai ga bin sahun wadanda ake zargin da manyan motocin na tsawon sama da makonni uku.
Ya yi zargin cewa wadanda ake zargin sun yi amfani da wata takardar kotu da ta bayar da damar yin gwanjon motocin dakon man fetur da aka tace ba bisa ka’ida ba.
