shugaban kwamitin karta kwana na shugaban kasa kan cutar corona, Boss Mustapha, yace gwamnatin tarayya ta mika ragamar yaki da cutar corona zuwa ga jihoshi da al’umomi.
A cewarsa, daga yanzu gwamnatin tarayya za take sa ido ne kawai tare da tsarawa.
Boss Mustapha wanda shine sakataren gwamnatin tarayya, yayi jawabi a fadar shugaban kasa bayan ‘yan kwamitin karta kwana sun yiwa shugaban kasa Muhammadu Buhari bayanin halin da ake ciki, tare da tattauna shawarwarinsu akan matakin da za a shiga na sabon shafin yaki da cutar.
A tare da shi lokacin ganawar akwai Ministan Lafiya, Dr. Osagie Ehanire, da jagora na kasa na kwamitin karta kwanan, Dr. Sani Aliyu, da Darakta-Janar na hukumar dakile bazuwar cututtuka ta kasa NCDC, Dr. Chikwe Ihekweazu, da kuma ministan cikin gida, Rauf Aregbesola.
