Hukumar Hisbah a jihar Kano ta ce ta kama wasu motoci uku makare da kwalaben giya guda dubu 5 da 800.
Babban Kwamandan Hukumar Hisbah, Haruna Ibn-Sina ne ya bayyana haka jiya a Kano yayin da yake duba motocin da aka kama a ofishin Hisbah.
Kakakin hukumar, Lawan Fagge, ya bayyana cewa an kama motocin uku ne a ranar Lahadi.
Motocin dai sun hada da mota kirar Mercedes Benz, wacce ke dauke da kwalaben giya dubu 1 da 800; sai mota kirar Sienna dauke da kwalaben giya dubu 3 sai Golf Volkswagen dauke da kwalaben giya dubu 1.
Lawan Fagge ya bayyana cewa Haruna Ibn-Sina ya yabawa sashin dakile kayan maye bisa kokarinsu na ganin an daina shan barasa da muggan kwayoyi a jihar.
Ya kuma ba da tabbacin cewa hukumar ba za ta yi kasa a gwiwa ba wajen ganin ta tsaftace jihar Kano daga duk wani nau’i na munanan dabi’u musamman safarar miyagun kwayoyi da ta’ammali da miyagun kwayoyi.
