Wani jirgin yakin sojin saman Najeriya ya jefa bama-bamai bisa kuskure a kauyen Kunkuna da ke karamar hukumar Safana a jihar Katsina, inda rahotanni suka ce mutane da dama sun mutu.
An bayar da rahoton cewa, jirgin ya kai hari bisa kuskure a wani samame da aka nufi kaiwa sansanonin ‘yan ta’adda a yankin.
Har yanzu dai rundunar sojin Najeriya ba ta ce uffan ba dangane da lamarin.
A ranar 17 ga watan Junairun shekarar 2017 ne jirgin yakin sojojin saman Najeriya ya jefa bam a sansanin ‘yan gudun hijira da ke garin Rann na jihar Borno bisa kuskure, inda ya kashe mutane 115 tare da raunata wasu 100.
A shekarar da ta gabata ma wani jirgin saman soji ya kai harin bam a garin Yunusari na jihar Yobe bisa kuskure, inda ya kashe mutane akalla 10.
