‘Yansanda sun tabbatar da cewa mutane 3 sun mutu kuma karin wasu 3 sun samu munanan raunuka bayan an yanyankesu da wuka a wani wajen taruwar jama’a a birnin Reading na Ingila.
An kama wani mutum mai shekaru 25 a duniya daga birnin na Reading, bisa zargin kisan kai bayan an cafke shi a wajen da lamarin ya auku.
Harin ya auku a wani lambu, inda aka soki mutane da dama da wuka.
A yanzu ‘yansanda basa duban lamarin a matsayin mai alaka da ta’addanci, amma an kira jami’an yaki da ta’addanci zuwa wajen.
Majiyoyin tsaro sun shaidawa BBC cewa an kama wani mutum a wajen da abin ya auku, kuma ana kyautata zaton cewa dan kasar Libya ne.
